Presidenti amerikan Donald Trump, menjëherë pas konferencës së përbashkët me Vladimir Putin dhe një interviste për Fox News, deklaroi se Ukraina ndodhet përpara një vendimi historik mbi arritjen e armëpushimit.

“Jemi shumë afër një marrëveshjeje. Ukraina duhet ta pranojë atë. Ata mund të thonë edhe jo”, u shpreh Trump përballë gazetarit Sean Hannity, duke theksuar se hapi i radhës do të jetë organizimi i një takimi trepalësh midis tij, presidentit rus Vladimir Putin dhe presidentit ukrainas Volodymyr Zelensky.

Sipas tij, të dy liderët – Putin dhe Zelensky – e dëshirojnë praninë e tij në tryezën përfundimtare të bisedimeve: “Të dy më duan atje dhe unë do të jem,” tha Trump, duke anashkaluar zotimin e dikurshëm se kriza do të zgjidhej “brenda 24 orëve”. Ai pranoi se kishte gjykuar gabim, duke theksuar: “Mendova se do të ishte më e lehtë për t’u zgjidhur, por ishte më e vështira. Megjithatë, jemi shumë afër fundit.”

Një nga pikat më të debatueshme të bisedimeve mbetet çështja e shkëmbimeve territoriale. Trump pranoi se kishte pasur një mirëkuptim të gjerë me Putinin që fundi i luftës mund të vijë përmes lëshimeve tokësore nga Ukraina në këmbim të një garancie sigurie nga SHBA.

I pyetur nga gazetarët nëse kjo nënkupton dhënien e territoreve të reja Rusisë, Trump u përgjigj: “Këto janë pika për të cilat kemi rënë dakord kryesisht. Ishte një takim i ngrohtë dhe besoj se ne biem dakord për shumë gjëra.” Megjithatë, ai refuzoi të zbulonte cili ishte “problemi më i madh” për të cilin ende nuk kishte dakordësi me Putinin.

Në një moment, Trump tregoi se Putin kishte vlerësuar drejtpërdrejt rolin e tij dhe fuqinë e SHBA-së: “Vladimiri tha se nuk kishte parë kurrë askënd të bënte kaq shumë, kaq shpejt. Ai tha: ‘Vendi juaj është i nxehtë si një armë. Një vit më parë unë mendoja se ishte i vdekur’.”

Samiti i Alaskës, i mbështjellë me pompozitet dhe retorikë paqeruajtëse, duket se ka prodhuar më shumë pyetje sesa përgjigje, ndërsa sytë tashmë janë te Zelensky, i cili duhet të vendosë nëse do të pranojë kushtet e reja për një marrëveshje historike.