YouTuberi dhe boksieri Logan Paul dhe modelja daneze Nina Agdal janë martuar në një ceremoni madhështore në Liqenin Como, Itali, aty ku dy vite më parë Paul i kishte bërë propozimin romantik për martesë.

Dasma u mbajt mes një atmosfere intime, të rrethuar nga lule të bardha dhe një platformë rrethore ku çifti shkëmbeu betimet. Mike Majlak, bashkë-prezantuesi i podkastit Impaulsive, kishte nderin të drejtonte ceremoninë, ndërsa të ftuarit shihnin emocionuar momentin.

Të pranishëm ishin njerëzit më të afërt të çiftit, përfshirë vajzën e tyre 10-muajshe, Esmé, si dhe Jake Paul me të fejuarën e tij, patinatoren olimpike Jutta Leerdam. Jake ndau momente të ndjera nga dita, duke pranuar: “Kam qarë vërtet shumë”.

Dhëndri zgjodhi një kostum elegant bardhë e zi, ndërsa nusja u shfaq mahnitëse me një fustan të bardhë pa rripa, me korse dhe dantellë delikate, duke marrë gjithë vëmendjen e të pranishmëve.

Martesa në Itali ishte një zgjedhje plot kuptim për çiftin, pasi pikërisht aty, në korrik 2023, Logan i propozoi Ninës gjatë pushimeve.