Istog – Kryetari i Partisë Demokratike, Sali Berisha, zhvilloi një vizitë private në Istog të Kosovës, ku mori pjesë në disa aktivitete lokale dhe zhvilloi një intervistë për televizionin Kanali10. Gjatë vizitës, Berisha vizitoi varret e dëshmorëve të rënë në luftën për lirinë e Kosovës dhe shprehu nderimin e tij për kontributin e tyre.

Në intervistë, kryedemokrati u shpreh për procesin në Gjykatën Speciale në Hagë:
“Gjerë sot nuk kam lexuar një fakt të vetëm përgjegjës për ata që udhëhoqën këtë luftë dhe që janë sot në bangën e akuzës. Uroj që ky proces të konfirmojë, të sanksionojë pafajësinë e tyre dhe rolin që ata luajtën. Ata udhëhoqën një luftë çlirimtare,” deklaroi Berisha.

Vizita e tij nuk u ndal vetëm te dëshmorët. Berisha nderoi edhe figurën e ish-presidentit të Kosovës, Ibrahim Rugova, duke vlerësuar rolin e tij në çështjen e drejtë të popullit kosovar dhe sigurimin e pavarësisë së vendit:
“Është burri i madh i këtij kombi që çështjen e drejtë të popullit të Kosovës, çështjen e lirisë dhe pavarësisë së tij, e mori nga barakat e Lidhjes Demokratike të Kosovës në Prishtinë dhe e çoi deri në Dhomën Ovale, në zyrat më të larta të SHBA,” tha kryedemokrati.

Berisha rrëfeu gjithashtu eksperiencën e tij gjatë vizitës në bjeshkët e Istogut, duke përfshirë udhëtimin deri në Çorovodë dhe kufi. Ai theksoi se kishte shijuar bukuritë natyrore të kësaj zone, por nuk mund të largohej pa shprehur nderimin dhe mirënjohjen për dhjetëra djem e vajza të Istogut që ranë në luftë për lirinë dhe dinjitetin kombëtar:
“Betejat e luftëtarëve të Istogut dhe të kësaj zone kanë qenë nga më të përgjakshmet, por me një rol shumë të veçantë në lirinë dhe pavarësinë e Kosovës. Shpreh edhe njëherë nderimin më të madh dhe mirënjohjen më të pakufishme ndaj luftëtarëve të UÇK-së, të cilët me luftën e tyre mbrojtën vlerat e shqiptarëve dhe i dhanë fund një kolonie në zemër të Europës, që përbënte një turp të madh dhe të patolerueshëm,” tha Berisha.

Ai kujtoi edhe qytetarët e pambrojtur që pësuan nga barbaritë serbe gjatë luftës, duke përmendur 53 persona të moshuar dhe me aftësi të kufizuara që u sulmuan:
“Edhe për ata unë shpreh nderimin tim më të madh,” u shpreh Berisha.

Gjatë intervistës, Berisha sqaroi gjithashtu vizitën e tij private tek miqtë dhe pjesëmarrjen në aktivitetet festive, duke përmendur ditëlindjen e Gani Dreshës dhe pjesëmarrjen në aktivitete lokale me banorët e Istogut:
“Isha në një vizitë private tek miq të mi. Festuam ditëlindjen e Gani Dreshës dhe u ndjeva shumë i nderuar që isha mik i tyre. Vizitova bjeshkën e Istogut gjer në Çorovodë, në kufi dhe pata fatin të shijoj mahninë e kësaj bjeshke. Por natyrisht nga Istogu nuk mund të largohesha kurrë pa shprehur nderimin tim më të thellë, pa u përulur me mirënjohjen më të pakufishme, para dhjetëra e dhjetëra djemve e vajzave të Istogut që ranë me pushkë në dorë për lirinë dhe dinjitet kombëtar, për Kosovën e pavarur,” tha Berisha.

Ky udhëtim i Sali Berishës në Istog shënon një moment të rëndësishëm për marrëdhëniet mes figurave politike shqiptare dhe komunitetit kosovar, duke kombinuar vizitën private me mesazhe publike për nderimin e dëshmorëve, ruajtjen e kujtesës historike dhe qëndrimin për proceset ndërkombëtare gjyqësore.