Një ngjarje e rëndë ka tronditur sot qytetin e Kosturit në Greqi, ku një i burgosur shqiptar, i dënuar për vepra të rënda penale, ka arritur të arratiset nga Spitali i Përgjithshëm i Kosturit.

28-vjeçari, i identifikuar si Lulëzim Xibraku, ishte shtruar në klinikën kirurgjikale të spitalit dhe mbahej nën vëzhgim të vazhdueshëm nga gardianët. Megjithatë, në rrethana ende të paqarta, ai ka mundur të largohet, duke lënë pas në befasi personelin e sigurisë.

Burime policore greke bëjnë me dije se Xibraku konsiderohet person me rrezikshmëri të lartë, ndërsa dyshohet se arratisja e tij është ndihmuar edhe nga bashkëpunëtorë të jashtëm.

Pas ngjarjes, policia ngriti menjëherë pika kontrolli në akset kryesore të Kosturit, duke qenë se zona ndodhet shumë pranë kufirit shqiptaro-grek. Forcat e rendit vijojnë kërkimet intensive për kapjen e të arratisurit.