Marash Kumbulla, qendërmbrojtësi i kombëtares shqiptare, është prezantuar zyrtarisht si futbollist i ri i RCD Mallorca-s, ku do të luajë deri në fund të sezonit si i huazuar nga AS Roma.

“Jam shumë i lumtur që jam këtu. Kam folur me drejtorin, Pablo Ortells, dhe me trajnerin Jagoba Arrasate, dhe ata kanë shumë besim tek unë. Më kanë treguar shumë për projektin që ka Mallorca dhe, sapo më thirrën, desha të vija sa më shpejt të ishte e mundur”, – u shpreh mbrojtësi 25-vjeçar gjatë prezantimit.

Ky është një “rikthim” në LaLiga për Kumbullën, i cili sezonin e kaluar ka luajtur me Espanyol-in, duke zhvilluar 36 ndeshje mes kampionatit dhe Kupës së Mbretit.

Mbrojtësi kuqezi zbuloi objektivat e tij në aventurën e re:
“Dua të luaj sa më shumë ndeshje të jetë e mundur dhe të ndihmoj skuadrën të arrijë maksimumin. Shpresoj që gjithçka të shkojë mirë. Me trajnerin kemi folur për atë që ai kërkon, për klubin, tifozët dhe gjithçka që përfaqëson Mallorca. Më pëlqeu shumë.”

Në klubin e ri, Kumbulla do të gjejë edhe një fytyrë të njohur nga Serie A, sulmuesin kosovar Vedat Muriqi:
“Me Vedatin kemi folur edhe kur e takova tek Espanyol-i. Kam një marrëdhënie të mirë me të dhe mezi pres ta shoh përsëri së shpejti”, – tha Kumbulla.

Në fund, mbrojtësi shqiptar nuk harroi të dërgojë një mesazh për tifozët e Mallorcas:
“Faleminderit për mikpritjen. Do të jap gjithçka për këtë stemë dhe dua të luaj këtu, së bashku me ju.”

Kumbulla bëhet kështu i pari futbollist shqiptar që vesh fanellën e RCD Mallorca-s, pas aventurave të tij në Itali me Hellas Verona dhe Sassuolo, si dhe te Roma. Ai ka luajtur 24 ndeshje me kombëtaren shqiptare dhe është pjesë e brezit të ri të kuqezinjve.