Në një kohë kur qeveria turke u ka kërkuar të gjitha institucioneve të shkurtojnë shpenzimet publike, Ministrja e Familjes dhe Shërbimeve Sociale, Mahinur Özdemir Göktaş, është vënë në qendër të kritikave për udhëtimin e saj luksoz nëpër Anadoll me një Mercedes-Benz S63-E me vlerë 32 milionë lira turke (rreth 670,000 euro).

Skandali shpërtheu pasi Göktaş, gjatë vizitës së saj në Karabık, la në garazh makinën e saj zyrtare, një Togg elektrike e prodhuar në Turqi, me vlerë 2.63 milionë lira (rreth 55,000 euro), dhe preferoi të lëvizte me S-Class-in luksoz, i pajisur edhe me sedilje masazhi.

Kjo zgjedhje bie në kundërshtim të hapur me direktivat e Ministrit të Financave, Mehmet Simsek, i cili prej javësh bën thirrje për masa shtrënguese dhe kursime në çdo nivel, nga udhëtimet e deri te përdorimi i pronës shtetërore.

Reagimet në rrjetet sociale nuk kanë munguar, ku përdoruesit ironizojnë duke shkruar:

“Mos e lini Simsek ta shohë këtë!”

Mahinur Özdemir Göktaş, e vetmja grua dhe anëtarja më e re e kabinetit turk, ka një profil të veçantë. E lindur në Belgjikë, ajo mban dy shtetësi dhe ka qenë më parë deputete në parlamentin e Brukselit, ku u bë e njohur pasi refuzoi të marrë pjesë në heshtjen njëminutëshe për gjenocidin armen.

Në vitet 2022-2023, ajo shërbeu si ambasadore e Turqisë në Algjeri, ndërsa karriera e saj politike shpesh është shoqëruar me debat. Një detaj interesant është se fillimisht dëshironte të studionte drejtësi, por hoqi dorë pasi nuk do t’i lejohej të fliste në gjykatë duke mbajtur shami.

Skandali pritet të shtojë tensionet brenda qeverisë turke, ndërkohë që opinioni publik e sheh këtë veprim si hipokrizi në kohën kur qytetarëve u kërkohet të përballojnë masa të rrepta kursimi.