Një ngjarje e rëndë ka tronditur qytetin italian të Cagliarit, ku dy persona kanë humbur jetën dhe mbi 30 të tjerë janë helmuar gjatë festivalit “Fiesta Latina”, i organizuar në fund të korrikut në zonën Monserrato.

Sipas mediave italiane, pjesëmarrësit kanë shfaqur shenja të rënda helmimi pak orë pas konsumimit të ushqimeve të shërbyera në aktivitet. Dy prej tyre nuk kanë mundur të mbijetojnë, ndërsa dhjetëra të tjerë janë dërguar me urgjencë në spital.

Autoritetet shëndetësore dhe policia kanë nisur hetimet për të përcaktuar burimin e kontaminimit. Laboratorët po analizojnë mostrat e ushqimeve të shërbyera gjatë festivalit, ndërsa nuk përjashtohet mundësia e pakujdesisë në ruajtjen ose përgatitjen e tyre.

Ngjarja ka shkaktuar panik dhe indinjatë te banorët lokalë dhe pjesëmarrësit e festivalit, ndërsa hetimet pritet të zbulojnë përgjegjësit për këtë helmim masiv.