Mynih, 20 gusht 2025 — Një aksident i rëndë është regjistruar pak pas mesnatës në autostradën A8, që lidh Salzburgun me Mynihun, pranë kryqëzimit të Irschenbergut. Një autobus që sipas mediave gjermane kishte ardhur nga Kosova, është përplasur me një kamion, duke shkaktuar 30 të plagosur nga 41 pasagjerët që ndodheshin në bord.

Sipas policisë gjermane, dy persona ndodhen në gjendje të rëndë dhe janë shtruar në spital, ndërsa katër të tjerë janë dërguar në klinika për ekzaminime të mëtejshme. Për të menaxhuar situatën, autoritetet ngritën një vend grumbullimi për të plagosurit në stacionin e zjarrfikësve në Irschenberg.

“Pak pas mesnatës, 30 persona u plagosën në një aksident me autobus në autostradën A8 pranë kryqëzimit të Irschenbergut, kur autobusi u përplas me një kamion. Autostrada u mbyll në drejtim të Mynihut për disa orë”, njofton portali br.de.

Hetimet paraprake tregojnë se shoferi i autobusit e ka vënë re kamionin përpara shumë vonë. Ai ka tentuar të shmangë përplasjen duke devijuar majtas, por nuk ka arritur të evitojë kontaktin me rimorkion e kamionit, ku pjesa e përparme e autobusit është ngecur duke pësuar dëme të mëdha.

Në vendngjarje kanë ndërhyrë ekipe të shumta të ndihmës së shpejtë, mjekë emergjence, sanitarë dhe një helikopter për transportin e të plagosurve. Autostrada në drejtim të Mynihut u bllokua plotësisht për më shumë se dy orë, duke shkaktuar trafik të rënduar në zonë.

Autoritetet gjermane kanë nisur hetimet për të zbardhur shkaqet e aksidentit dhe për të përcaktuar përgjegjësitë.