Autoritetet franceze kanë hapur një hetim penal pas vdekjes së Raphael Graven, 46 vjeç, i njohur online si Jean Pormanove, i cili ndërroi jetë gjatë një transmetimi live në platformën Kick. Ngjarja ndodhi në Contes, pranë Nicës, ndërsa prokuroria ka urdhëruar autopsinë për të përcaktuar shkaqet e vdekjes.

Jean Pormanove ishte bërë i njohur në Kick për videot ku përjetonte dhunë dhe poshtërime publike nga bashkë-transmetuesit e tij. Pas ngjarjes, ministrja franceze për Inteligjencën Artificiale dhe Teknologjinë Digjitale, Clara Chappaz, reagoi ashpër:

“Vdekja e Jean Pormanove dhe dhuna që ai ka pësuar janë absolutisht të tmerrshme.”

Platforma Kick France ka deklaruar se po bashkëpunon me autoritetet dhe ka nisur rishikimin e përmbajtjes në Francë. Të gjithë bashkë-transmetuesit e përfshirë janë pezulluar deri në përfundimin e hetimeve.

Nga ana tjetër, avokati Yassin Sadouni, që përfaqëson një prej bashkë-transmetuesve, ka deklaruar për BFM TV se dhuna e transmetuar ishte e inskenuar:

“Të gjitha skenat ndiqnin një skenar, nuk ishin reale. Viktima vuante nga probleme kardiovaskulare.”

Megjithatë, mediat franceze kanë publikuar fragmente video ku Pormanove shihet teksa dhunohet, fyhet, lyhet me bojë dhe vaj, mbytet dhe qëllohet me armë paintball. Ende nuk është e qartë nëse ai merrte pjesë me dëshirë apo ishte i detyruar.

Çështja i është referuar edhe rregullatorit francez të komunikimeve audiovizive Arcom dhe portalit kombëtar Pharos për përmbajtje të paligjshme në internet. Hetimet pritet të zbulojnë nëse platforma Kick ka shkelur detyrimet ligjore për kontrollin e përmbajtjes dhe mbrojtjen e përdoruesve.