Seanca e Kuvendit të Kosovës për zgjedhjen e kryetarit të parlamentit ka përfunduar sërish pa sukses, pasi Lëvizja Vetëvendosje nuk arriti të sigurojë votat e nevojshme për kandidatët e saj.

Nga 116 deputetë të pranishëm, 57 votuan pro, 56 kundër dhe 3 abstenime. Albulena Haxhiu, kandidatura kryesore e VV-së, nuk arriti të marrë kuorumin e nevojshëm.

Pas kësaj, deputeti Glauk Konjufca propozoi Donika Gërvallën si kandidate alternative, por edhe ajo nuk mori mbështetjen e mjaftueshme.

Seanca e radhës është caktuar për 22 gusht, ndërsa kjo ngjarje vjen pas vendimit të Gjykatës Kushtetuese, e cila urdhëroi që kryetari i Kuvendit të zgjidhet brenda 30 ditëve, përmes votimit të hapur.

Në këtë situatë, opozita dhe VV-ja nuk kanë arritur kompromis, duke e vënë në pikëpyetje nisjen e funksionimit normal të institucioneve.