Tiranë – Ministri i Drejtësisë, Ulsi Manja, ka njoftuar sot se gjatë periudhës janar–korrik 2025 janë ekzekutuar 5,846 dosje kompensimi, duke u shpërndarë qytetarëve 4.2 miliardë lekë dhe 75.65 hektarë tokë.

Në një postim në rrjetet sociale, Manja theksoi se Ministria e Drejtësisë vijon të jetë e përkushtuar për mbrojtjen e të drejtave të pronarëve dhe forcimin e shtetit të së drejtës.

“Jemi të vendosur të zbatojmë ligjin dhe të garantojmë drejtësinë për të gjithë qytetarët. Procesi i kompensimit të pronarëve do të vijojë me të njëjtin ritëm”, – shkruan Manja.

Sipas Ministrisë, kompensimet kanë përfshirë si shpërblime financiare, ashtu edhe kthim pronash, duke u dhënë zgjidhje mijëra qytetarëve që prej vitesh presin realizimin e të drejtave të tyre.