Një tajfun i fuqishëm, i quajtur “Kajiki”, ka goditur provincat bregdetare të Vietnamit, duke sjellë erëra të forta dhe reshje të dendura shiu që rrëzuan pemë dhe shkatërruan çatitë e shtëpive. Shkollat dhe aeroportet janë mbyllur, ndërsa autoritetet kanë urdhëruar evakuimin e rreth 600 mijë banorëve për t’i mbrojtur nga rreziku i stuhisë.

Banorët e evakuuar raportojnë përmbytje të mëdha dhe situata kaotike, ndërsa qendra meteorologjike e Vietnamit ka paralajmëruar për rrezik përmbytjesh të menjëhershme dhe rrëshqitjesh dheu. Tajfuni godet një vit pas “Yagi”, stuhisë më të fuqishme që ka prekur Vietnamin në 30 vitet e fundit dhe që shkaktoi 300 viktima. Aktualisht, 400 komuna në gjashtë provincia ndodhen në alarm maksimal, ndërsa ekipet emergjente monitorojnë situatën dhe ndihmojnë banorët e evakuuar.