Kanë kaluar më shumë se katër muaj nga vdekja tragjike e dizajnerit të njohur kosovar Festim Isufi, i cili u gjet pa shenja jete më 9 maj në banesën e tij në Rrugën B, Prishtinë, por hetimet ende nuk kanë çuar në një përfundim konkret.

Familja dhe opinion publik vijojnë të presin zbardhjen e së vërtetës, ndërsa rasti ka mbetur një nga më të diskutuarit në Kosovë.

Sipas raportit të autopsisë, të finalizuar më 23 maj dhe dorëzuar Prokurorisë Themelore në Prishtinë, Isufi ka pësuar shtatë plagë nga një mjet i mprehtë, ndërsa plagët fatale në zonën e qafës rezultuan shkaktare të vdekjes. Përveç viktimës, bashkëshortja e tij, Rina Maloku-Isufi, u gjet në banesë me lëndime trupore dhe u dërgua për trajtim mjekësor.

Avokati i saj, Arianit Koci, ka deklaruar se Rina nuk është në cilësinë e të dyshuarës dhe se familja nuk ka marrë ende asnjë informacion zyrtar nga autoritetet.

“Unë nuk kam informacion as që e kanë mbyllur, as që nuk e kanë mbyllur. Policia nuk ka dhënë asnjë informacion. Dua të theksoj se Rina nuk është e dyshuar,” – u shpreh Koci.

Prokuroria ka konfirmuar se raporti i autopsisë, së bashku me provat e mbledhura në vendngjarje, janë ende pjesë e hetimeve aktive, por nuk ka dhënë një afat se kur do të ketë përfundime zyrtare.

Vdekja e Festim Isufit, 34 vjeç, një nga dizajnerët më të njohur në Kosovë dhe rajon, ka lënë një boshllëk të madh në botën e modës dhe artit, ndërsa pikëpyetjet rreth ngjarjes tragjike mbeten të shumta.