Një krizë e re politike ka përfshirë Tajlandën, pasi Gjykata Kushtetuese vendosi këtë të premte të shkarkojë nga detyra kryeministren Paetongtarn Shinawatra, duke e akuzuar atë për shkelje të standardeve etike.

Vendimi u mor nga nëntë gjyqtarë, të cilët shqyrtuan një telefonatë të zhvilluar në qershor mes Paetongtarn dhe ish-kryeministrit kamboxhian Hun Sen. Në regjistrimin e publikuar më vonë nga Hun Sen, Paetongtarn dëgjohej teksa pajtohej për një mosmarrëveshje kufitare mes dy vendeve dhe kritikonte një nga komandantët e saj ushtarakë.

Kryeministrja e rrëzuar ka mbrojtur veprimet e saj, duke deklaruar se telefonata ishte një përpjekje për të arritur një marrëveshje diplomatike me Hun Sen, një mik të vjetër të babait të saj, ish-kryeministrit Thaksin Shinawatra. Ajo u shpreh se biseda ishte konfidenciale dhe publikimi i saj i paautorizuar ka dëmtuar rëndë imazhin e saj dhe të partisë Pheu Thai.

Kriza u thellua kur partneri më i madh i koalicionit braktisi qeverinë, duke e lënë Paetongtarn me një shumicë të brishtë. Vendimi i sotëm nuk ishte surprizë, pasi që në korrik shtatë nga nëntë gjyqtarët kishin votuar për pezullimin e saj.

Paetongtarn bëhet kështu kryeministrja e pestë e Tajlandës e shkarkuar nga Gjykata Kushtetuese, të gjithë të lidhur me administratat e mbështetura nga familja Shinawatra. Ky fakt ka ushqyer dyshimet për një tendencë politike të gjykatës, e cila shpesh shihet si e ndikuar nga forcat konservatore dhe monarkiste që kundërshtojnë reformat e klanit Shinawatra.