Një ngjarje e rëndë ka tronditur Meksikën, pasi një influencere e njohur, Esmeralda Ferrer Garibay, 32 vjeçe, u gjet e vdekur brenda një kamioni, së bashku me bashkëshortin e saj, 36-vjeçar, dhe dy fëmijët e tyre, një djalë 13 vjeç dhe një vajzë vetëm 7 vjeçe.

Trupat e pajetë u zbuluan javën e kaluar në qytetin Guadalajara, por identitetet e viktimave u konfirmuan vetëm dje nga autoritetet. Familja ishte zhvendosur së fundmi në qytet për arsye pune dhe jetese.

Hetuesit dyshojnë se bashkëshorti i Garibay mund të ketë qenë shënjestra e sulmit, megjithatë motivacioni i vërtetë mbetet ende i paqartë dhe hetimet vijojnë intensivisht për zbardhjen e plotë të ngjarjes.

Ky rast tronditës vjen pak ditë pas një tjetër tragjedie të rëndë në Fontana, Kaliforni, ku influencuesja Gloria Zamora, 40 vjeçe, dhe partneri i saj, Hector Garduno, 43 vjeç, u ekzekutuan në parkingun e një restoranti sushi. Autori i dyshuar, bashkëshorti nga i cili Zamora po divorcohej, u vra pak më pas nga një zëvendës sherif jashtë detyrës.

Ngjarjet e fundit kanë shkaktuar tronditje të madhe në rrjetet sociale dhe kanë ngritur shqetësime për rritjen e dhunës ndaj figurave publike dhe sigurinë e familjeve të tyre.