Australia u përfshi këtë fundjavë nga protesta të mëdha kundër emigracionit, të njohura si “Marshimi për Australinë”, ku mijëra persona dolën në rrugë në qytete si Sydney, Melbourne, Adelaide dhe të tjera. Autoritetet i kanë cilësuar tubimet si të lidhura me ekstremizmin e djathtë dhe nxitje të urrejtjes racore.

Sipas ABC Australia, vetëm në Sydney numri i pjesëmarrësve arriti deri në 8,000 persona, ndërsa qindra efektivë policie u angazhuan për të ruajtur rendin. Përplasje sporadike u shënuan mes protestuesve dhe kundërdemonstruesve, por policia raportoi se nuk pati incidente madhore.

Në Melbourne, tensionet u rritën kur protestuesit u përplasën me pjesëmarrës në një tubim pro-Palestinë. Një nga folësit kryesorë ishte Thomas Sewell, një figurë e njohur neonaziste, i cili iu drejtua turmës nga shkallët e Parlamentit. Ndërkohë, në Adelaide, autoritetet raportuan një pjesëmarrje të kombinuar prej 15,000 personash, përfshirë edhe kundërprotestuesit.

Një pankartë në mbështetje të Dezi Freeman — një teoricien konspiracioni dhe “qytetar sovran”, i kërkuar nga autoritetet për vrasjen e dy oficerëve policie — tërhoqi vëmendje të veçantë dhe shkaktoi reagime të ashpra.

Protestat janë mbështetur nga disa figura politike të opozitës, si senatorja Pauline Hanson dhe deputeti federal Bob Katter. Gjithashtu, në organizimin e tyre janë identifikuar aktivistë të ekstremit të djathtë dhe neonazistë, të cilët ishin bërë të dukshëm edhe gjatë pandemisë.

Qeveria australiane ka reaguar ashpër. Ministri i Punëve të Brendshme, Tony Burke, deklaroi:

“Nuk ka vend për urrejtje në Australi. Tubime të tilla janë të papranueshme për një shoqëri moderne dhe të barabartë.”

Ndërsa ministrja për çështjet multikulturore, Anne Aly, u shpreh:

“Ne qëndrojmë me të gjithë australianët, pavarësisht prejardhjes, dhe nuk do të lejojmë që frika dhe racizmi të na ndajnë.”

Organizatorët e protestave pretendojnë se migrimi masiv po dëmton unitetin kombëtar dhe ndikon negativisht në strehimin, infrastrukturën, mjedisin dhe kriminalitetin.