Policia e Shtetit njofton finalizimin e një faze tjetër të operacionit ndërkombëtar “The Wanted”, i cili ka si qëllim lokalizimin, kapjen dhe arrestimin e shtetasve të shpallur në kërkim ndërkombëtar.
Në Budapest u arrestua Auron Hajdini, i njohur edhe si Auron Hysaj, 45 vjeç, i dënuar me 5 vite burg për vjedhje me dhunë. Falë bashkëpunimit të Policisë së Shtetit me autoritetet hungareze dhe shkëmbimit të informacionit përmes Interpol Tiranës, arrestimi u realizua me qëllim ekstradimin e tij drejt Shqipërisë.
Sipas vendimit të Gjykatës së Apelit Tiranë, datë 21.02.2024, Hajdinit i kanë mbetur për të vuajtur 2 vjet, 11 muaj e 16 ditë burgim. Ai ishte përfshirë në vitin 2013 në një grabitje të dhunshme në një pus nafte, ku së bashku me persona të tjerë, dhunoi rojen dhe mori një sasi nafte, një automjet, një armë gjahu, celular dhe disa dokumente.
Interpol Tirana dhe autoritetet hungareze vijojnë procedurat për finalizimin e ekstradimit të 45-vjeçarit në Shqipëri.
Ky operacion tregon efikasitetin e bashkëpunimit ndërkombëtar policor në kapjen e personave të shpallur në kërkim ndërkombëtar dhe ndjekjen e drejtësisë për krime të dhunshme.
