Një sherr mes katër të rinjve tronditi mbrëmjen e së premtes lagjen Celle në Livorno, Itali. Konflikti, që nisi si debat, u përshkallëzua shpejt në dhunë, duke shkaktuar panik te banorët.

Dy të rinj shqiptarë, rreth 20 vjeç, u përplasën me dy bashkëmoshatar me origjinë marokene. Sipas hetimeve paraprake, njëri prej të rinjve marokenë nxori një armë me plumba plastike dhe qëlloi disa herë në ajër dhe drejt tokës për të frikësuar kundërshtarët, ndërsa shoku i tij përdori një thikë, duke gërvishtur shpatullën e njërit prej të rinjve shqiptarë.

I plagosuri u transportua menjëherë në spital dhe, pas marrjes së ndihmës mjekësore, u largua në gjendje të mirë. Megjithatë, ai refuzoi të bëjë një kallëzim zyrtar.

Ngjarja, që ndodhi pranë banesave, u vërejt nga dëshmitarë të shumtë, të cilët raportuan zhurmat dhe të shtënat në rrjetet sociale, duke ngritur shqetësime për sigurinë në lagje.

Policia mbërriti pas largimit të agresorëve dhe identifikoi dy të rinjtë marokenë në një park të afërt. Njëri prej tyre, i cili përdori armën, përballet tashmë me akuza për kanosje të rënduar dhe mbajtje të armëve pa leje.