Izraeli ka njoftuar se Abu Obeida, zëdhënësi i krahut të armatosur të Hamasit, është vrarë në një sulm ajror në Gaza.

Ministri izraelit i Mbrojtjes, Israel Katz, e quajti operacionin një “ekzekutim të përsosur”, duke përgëzuar Forcat e Mbrojtjes të Izraelit (IDF) dhe Shin Bet për realizimin e tij. Sipas IDF-së, avionët luftarakë sulmuan një “terrorist kyç” në lagjen al-Rimal të shtunën, ndërsa mediat izraelite raportojnë se shënjestra ishte Obeida.

Nga ana tjetër, Hamasi nuk e ka konfirmuar ende vdekjen e tij, duke deklaruar se dhjetëra civilë janë vrarë dhe plagosur nga bombardimet izraelite në një ndërtesë banimi në të njëjtën zonë. Dëshmitarët raportuan se pesë raketa goditën ndërtesën gjashtëkatëshe, ku ndodhej edhe një klinikë dentare. Sipas tyre, shuma të mëdha parash dolën nga dritaret pas shpërthimit, para që dyshohet se përdoreshin nga anëtarët e Hamasit.

Abu Obeida ishte një nga figurat më të larta të mbetura të krahut ushtarak të Hamasit që nga sulmi i 7 tetorit 2023 në Izraelin jugor. Në deklaratën e përbashkët, IDF dhe Shin Bet e përshkruajnë atë si “fytyrën publike të Hamasit” dhe shpërndarësin kryesor të propagandës së grupit.

Gjithmonë i maskuar me shall palestinez, Obeida ishte kthyer në një simbol për mbështetësit e Hamasit në Lindjen e Mesme. Në atë që besohet të ketë qenë fjalimi i tij i fundit, të premten, ai paralajmëroi se fati i pengjeve izraelite do të ishte i njëjtë me atë të luftëtarëve të Hamasit, duke i dërguar një mesazh të ashpër Tel Avivit.

Ministri Katz paralajmëroi gjithashtu se fushata izraelite në Gaza do të intensifikohet dhe se të tjerë drejtues të Hamasit janë tashmë në shënjestër.