Shkodër – Policia e Shkodrës ka finalizuar me sukses operacionin policor të koduar “By pass”, me qëllim goditjen e veprimtarive kriminale që lidhen me ndihmën për kalimin e paligjshëm të kufirit, kundrejt pagesës.
Si rezultat i operacionit, është vënë në pranga A. M., 28 vjeç, banues në Tiranë dhe i dënuar më parë për vjedhje. Ky shtetas u arrestua në flagrancë teksa po transportonte 4 emigrantë të paligjshëm drejt kufirit me Malin e Zi, duke kërkuar nga secili prej tyre 1500 euro.
Momenti i arrestimit
Policia e lokalizoi 28-vjeçarin pranë rrethrrotullimit “5 Heronjtë e Vigut” në Shkodër, duke drejtuar një automjet tip “Audi”, pa leje drejtimi. Gjatë kontrollit rezultoi se emigrantët ishin marrë në Gjirokastër dhe po transportoheshin drejt kufirit me Malin e Zi, me qëllim kalimin e paligjshëm.
Veprimet procedurale
Katër emigrantët e paligjshëm janë proceduar penalisht në gjendje të lirë për veprën “Kalimi i paligjshëm i kufirit shtetëror”. Materialet e mbledhura i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Shkodër për veprime të mëtejshme.
Forcat e përfshira
Operacioni “By pass” u zhvillua nga specialistët e Seksionit për Trafiqet e Paligjshme, në bashkëpunim me Forcën e Posaçme “Shqiponja”, Policinë Rrugore dhe Komisariatin e Policisë Shkodër. Hetimet paraprake vijojnë për të zbuluar persona të tjerë të përfshirë në këtë aktivitet kriminal.
