Grant Harrold, ish-butler i familjes mbretërore britanike, ka ndarë një kujtim që sipas tij tregonte qartë se Princi William dhe Kate Middleton ishin të destinuar për martesë. Harrold shërbeu për Mbretin Charles (atëherë Princ i Uellsit) nga viti 2004 deri në 2011, duke pasur mundësinë të ndiqte nga afër fillimet e lidhjes së çiftit.
Pas ndarjes së tyre në vitin 2007 dhe ribashkimit disa muaj më vonë, Harrold kujton një darkë intime në Highgrove House në vitin 2008, ku shërbeu vetëm për William dhe Kate. “Ishin vetëm të dy, atmosfera ishte e qetë dhe romantike, por edhe shumë miqësore me mua. Pikërisht atëherë kuptova që do të martoheshin,” tha ai.
Sipas tij, pas ribashkimit, marrëdhënia e çiftit ndryshoi dukshëm: “Më parë dukeshin më shumë si miq, por pas kthimit bashkë, gjithçka ndryshoi. U bënë një çift i pandashëm dhe ne e dinim që martesa ishte vetëm çështje kohe.”
Më 29 prill 2011, William dhe Kate u kurorëzuan në një nga ceremonitë mbretërore më të ndjekura në botë. Harrold thekson se marrëdhënia e tyre i kujtonte marrëdhënien e Mbretëreshës Elizabeth dhe Princit Philip: partnerë në dashuri dhe në jetë, por edhe miq të ngushtë.
“Janë partnerë në dashuri dhe në jetë, njësoj siç ishin Elizabeth dhe Philip,” përfundoi ish-butleri.
