Autoritetet greke kanë goditur një organizatë kriminale në ishullin e Kretës, ku 49 persona janë vënë në pranga. Mediat lokale kanë publikuar foto nga dhoma ku u sekuestruan armë të ndryshme, kryesisht pushkë gjuetie dhe luftarake, pistoleta, municione, pjesë dhe këllëfe armësh, kartëmonedha euro, telefona celularë, si dhe pako me drogë.

Ditën e sotme, të arrestuarit dolën para hetuesit dhe prokurorit të Hanias, në grupe prej tetë personash, ku pritet të kërkojnë afat për të dhënë deklaratat e tyre.

Sipas policisë greke, xhiroja e fitimit nga aktiviteti kriminal i organizatës ishte rreth 3 milionë euro. Nga ky shumë, 1.1 milionë euro vinin nga trafiku i drogës, ndërsa pjesa tjetër, rreth 1.5 milionë euro, ishte nga aktivitete të tjera kriminale. Çdo anëtar merrte pjesën e tij, por shumica e parave përfundonte tek dy vëllezërit biznesmenë, të cilët dyshohen si krerët e mafias në Kretë.

Hetimi filloi nga një rast trafikimi droge dhe zbuloi një rrjet me shumë tentakula që shpërndante edhe armë, përfshirë kallashnikove. Një rol vendimtar në shkatërrimin e organizatës luajtën dy oficerë policie të fshehtë, të cilët u maskuan si punonjës restoranti dhe fituan besimin e anëtarëve, duke siguruar informacione kyçe që çuan në çmontimin e strukturës kriminale.

Figurat kryesore të organizatës dyshohet se janë dy vëllezër biznesmenë nga Hania, të njohur në komunitetin vendas dhe të ndjekur më parë nga autoritetet për raste zhvatjeje dhe çështje penale të hapura. Shumë nga të arrestuarit kishin shqetësuar më parë policinë, duke pasur edhe dënime me burg ose çështje të pazgjidhura penale.