Rusia ka mohuar çdo përfshirje në incidentin e ndodhur në Bullgari, ku për më shumë se 40 minuta u ndërprenë sinjalet GPS në zonën e Aeroportit të Plovdivit, duke krijuar vështirësi në uljen e avionit me të cilin udhëtonte presidentja e Komisionit Evropian, Ursula von der Leyen.

“Informacioni juaj është i pasaktë,” deklaroi zëdhënësi i Kremlinit, Dmitry Peskov, për Financial Times, pas raportimeve se pilotët u detyruan të mbështeteshin në harta letre për të realizuar një ulje të sigurt.

Nga ana tjetër, një zëdhënës i Bashkimit Evropian i tha Sky News:
“Kemi marrë informacion nga autoritetet bullgare se dyshojnë se kjo ndërhyrje e hapur është kryer nga Rusia.”

Incidenti ndodhi teksa von der Leyen ndodhej në Bullgari për një takim me kryeministrin dhe për të vizituar një fabrikë municionesh. Për shkak të ndërprerjes së sinjaleve, piloti bëri disa xhiro në ajër përpara se të arrinte të ulte avionin në mënyrë të sigurt, duke përdorur metoda tradicionale navigimi.

Gjatë vizitës së saj, Ursula von der Leyen deklaroi:
“Rusia përbën ende një kërcënim të madh për sigurinë evropiane dhe Bashkimi Evropian duhet të reagojë me mbrojtje më të fortë.”

Pas përfundimit të takimeve, ajo u largua nga Plovdiv me të njëjtin avion, pa hasur probleme të tjera teknike.

Deri tani, autoritetet bullgare kanë nisur një hetim të plotë për incidentin, ndërsa Brukseli ka paralajmëruar masa për forcimin e sigurisë ajrore në rajon.