Para ndeshjes së Shqipërisë me Letoninë më 9 shtator 2025 për eliminatoret e Botërorit “USA–Canada–Mexico 2026”, UEFA ka vendosur një masë të rëndë ndaj Federatës Shqiptare të Futbollit (FSHF). Gjoba prej 200 mijë eurosh dhe detyrimi që 20% e ulëseve në “Air Albania Stadium” të mbeten bosh është pasojë e sjelljeve të papranueshme të tifozërisë gjatë ndeshjes kundër Andorrës, ku u dëgjuan thirrje urrejtjeje ndaj Serbisë dhe u hodhën sende në fushë.

Ky nuk është rasti i parë. Vetëm gjatë katër viteve të fundit, FSHF-ja ka paguar mbi 2 milionë euro gjoba për veprime të ngjashme të një grupi të vogël tifozësh, që vetëquhen “kuq e zi”.

Ekspertët e futbollit dhe drejtuesit e FSHF-së theksojnë se këto sjellje nuk përfaqësojnë shpirtin patriotik të Kombëtares, por dëmtojnë imazhin e sportit shqiptar. “Paratë që sot përdoren për të paguar gjoba mund të shërbenin për ndërtimin e terreneve sportive, mbështetjen e ekipeve të të rinjve, trajnimet për trajnerët dhe gjyqtarët apo projekte sociale”, theksohet në njoftim.

FSHF-ja dhe autoritetet shtetërore paralajmërojnë masa të rrepta: identifikim dhe ndëshkim individual për çdo shkelës, përjashtim i përjetshëm nga stadiumet për përsëritësit, si dhe ndjekje penale për fyerje publike dhe veprime që rrezikojnë sigurinë.

Ndeshja kundër Letonisë shihet si një mundësi për tifozët e vërtetë që të tregojnë anën më të bukur të mbështetjes dhe të krijojnë një ambient të denjë për futbollin shqiptar, larg thirrjeve urrejtjeje dhe gjobave që dëmtojnë Kombëtaren.