Presidentja e Kosovës, Vjosa Osmani, ka kujtuar më 7 shtator 1990 miratimin e Kushtetutës së Kaçanikut, duke e cilësuar atë si një akt të jashtëzakonshëm guximi politik dhe besimi në lirinë dhe pavarësinë e vendit.

“Kjo Kushtetutë ishte më shumë se një dokument juridik; ishte betim se Kosova do të jetë e lirë dhe e pavarur mes kombeve të tjera të lira. Sot, përulemi me nderim para atyre që guxuan atëherë, kur duhej të rrezikonin gjithçka, dhe me krenari vazhdojmë rrugën që ata trasuan”, ka theksuar Osmani.

Sipas saj, Kushtetuta e Kaçanikut mbajti gjallë shpresën dhe qëndresën e popullit të Kosovës dhe shërbeu si themeli mbi të cilin u ngrit Republika e Kosovës, duke lënë një trashëgimi të pakontestueshme historike dhe politike.