Gjatë një konference për shtyp në TIF, kryeministri i Greqisë, Kyriakos Mitsotakis, komentoi situatën në Rripin e Gazës dhe perspektivën e njohjes së shtetit palestinez nga qeveria greke.

Ai theksoi se qeveria greke ka kritikuar ashpër humbjen e jetëve dhe ka bërë thirrje për një armëpushim të menjëhershëm, duke nënvizuar se këtë qëndrim e ka komunikuar edhe tek udhëheqësit izraelitë. “Ne kemi një aleancë strategjike me Izraelin. Kjo nuk na ka penguar të kritikojmë atë që po ndodh në Gaza dhe të këmbëngulim në zgjidhjen me dy shtete”, tha Mitsotakis.

Kryeministri shtoi se kriza humanitare në Gaza është e paimagjinueshme dhe duhet të ndalet. Ai gjithashtu njoftoi se Greqia do ta njohë shtetin e Palestinës, duke shtuar: “Pyetja është se kur dhe si”, duke lënë të hapur kohën dhe format e vendimit.

Ky qëndrim vjen ndërsa situata në Gaza vazhdon të jetë kritike dhe bota kërkon zgjidhje diplomatike.