Tiranë – Kryeministri Edi Rama është gati të zbulojë kabinetin e ri qeveritar për mandatin e katërt të Partisë Socialiste. Sot, gjatë mbledhjes së Asamblesë së Përgjithshme të PS-së, pritet që ai të publikojë listën e ministrave që do të formojnë ekzekutivin e ri.

Në një postim në rrjetet sociale mëngjesin e kësaj të enjteje, Rama publikoi një foto nga zyra e tij në Kryeministri, të shoqëruar me përshëndetjen:

“MIRËMËNGJES 🌞 Shihemi në 11:00.”

Krahas prezantimit të kabinetit, Rama pritet të shpalosë edhe prioritetet kryesore të qeverisë për katër vitet e ardhshme. Në fokus do të jetë procesi i integrimit evropian, me sloganin:
“Shqipëria 2030 në BE.”

Sipas burimeve nga brenda PS-së, ndryshimet në kabinet pritet të jenë të rëndësishme, ndërsa Asambleja e sotme shihet si momenti kyç për të përcaktuar drejtimin e qeverisjes në mandatin e katërt socialist.