Kërkimet për turistin çek, Pavel Pospisil, 68 vjeç, i cili rezulton i zhdukur prej disa ditësh në zonën e plazhit të Durrësit, vijojnë pa rezultat. Policia po kryen kontrolle intensive në zonë, ndërsa që nga dita e parë janë angazhuar edhe familjarët e tij për të ndihmuar në gjetjen e 68-vjeçarit.
Një ditë më parë, ambasada çeke në Tiranë i bëri thirrje publikut për bashkëpunim, duke kërkuar çdo informacion që mund të çojë në gjetjen e Pospisil. Sipas familjes, ai u pa për herë të fundit më 12 shtator, të premten e kaluar, rreth orës 11:00, teksa largohej nga hoteli ku po qëndronte për një shëtitje, por që prej atij momenti nuk ka pasur asnjë kontakt me bashkëshorten dhe vajzën e tij.
Një ditë më pas, ai u shpall zyrtarisht i humbur dhe policia nisi kërkimet. Ambasada dhe familja i bëjnë thirrje qytetarëve që për çdo informacion të mundshëm të kontaktojnë menjëherë me autoritetet shqiptare për të ndihmuar në gjetjen e turistit.
