Kryetari i Partisë Demokratike, Sali Berisha, ka mbledhur sot grupin parlamentar të selisë blu pas seancës plenare ku me 82 vota pro u miratua programi i qeverisë “Rama 4” dhe kabineti i ri, pa asnjë kundërshtim ose abstenim. Opozita nuk mori pjesë në votim, duke protestuar ndaj mënyrës së miratimit nga kryeministri Edi Rama dhe shumica e tij.

Berisha e ka cilësuar situatën si një akt të dhunës publike dhe një goditje ndaj parlamentarizmit. “Sot, sipas një skenari të parapërgatitur, që e lajmëroi vetë kryehorri i kombit, u asgjësua në momentin më solemn, momentin më të rëndësishëm të transparencës, të përgjegjësisë, parlamenti shqiptar,” tha ai.

Kreu i PD-së akuzoi Ramën dhe kryeparlamentarin Niko Peleshi për të krijuar një situatë të paprecedentë, duke kaluar programin dhe kabinetin brenda vetëm 5 minutave. “Ky është një akt brutal dhune publike ndaj qytetarëve shqiptarë të çdo spektri që ka marrë pjesë në votim. Ky është një akt brutal dhune ndaj opozitës dhe popullit opozitar,” shtoi Berisha, duke theksuar se veprimet e kryeministrit shkelin Kushtetutën dhe vullnetin e qytetarëve.

Seanca e sotme u zhvillua me tensione të larta, ku deputetët e PD-së bllokuan foltoren ndërsa shumica, nën drejtimin e kryetarit të Kuvendit, miratoi shpejt programin qeverisës. Opozita e konsideroi procesin të paligjshëm dhe arbitrar, duke u larguar nga foltorja dhe duke denoncuar mënyrën e menaxhimit të seancës nga mazhoranca.