Është zbardhur ngjarja e vrasjes së biznesmenit Bujar Nasufi, i ekzekutuar në janar të këtij viti pranë banesës së tij në Tiranë, në sy të bashkëshortes. Hetimet e policisë kanë nxjerrë në pah se shkak për ekzekutimin ishte një pronë në Selitë, që i përkiste Nasufit, por ishte shitur tek familja Xhani.

Në momentin e shpronësimit për ndërtimin e Unazës së Madhe, kompensimi prej rreth 30 mijë euro përfundoi në llogarinë e familjes Nasufi, pasi toka, edhe pse e shitur, figuronte ende në emrin e tij. Kjo situatë ka ndezur konfliktin mes dy familjeve.

Hetimet zbuluan se porositësit e vrasjes ishin vëllezërit Voltan dhe Jugert Xhani. Ekzekutimi dyshohet të jetë kryer nga një vrasës me pagesë, i maskuar si shpërndarës picash dhe i veshur me të zeza, i cili qëlloi disa herë me armë zjarri dhe më pas dogji motorin dhe armën e krimit, që më pas u gjetën nga policia.

Vëllezërit Xhani nuk janë të panjohur për autoritetet, pasi u arrestuan disa muaj më parë në zonën e Gjirit të Lalzit së bashku me Xhevdet Plakun dhe disa persona të tjerë, ku iu sekuestruan armë dhe lëndë narkotike. Përveç dyshimeve për porositjen e vrasjes së Nasufit, ata dyshohet të jenë të përfshirë edhe në ekzekutimin e Elis Rroshkodolit në Shkodër më 30 gusht 2024.