Korçë – Gjendja shëndetësore e tri motrave të mitura, të moshës 3, 7 dhe 11 vjeç, të cilat u shtruan pak ditë më parë në spital pas konsumimit të karameleve që përmbanin esencë kanabisi, ka shënuar përmirësim të dukshëm.

Burime nga shërbimi pediatrik i Spitalit të Korçës konfirmojnë se vajzat 7 dhe 11-vjeçare ndodhen jashtë rrezikut dhe në gjendje të qëndrueshme. Ndërkohë, motra më e vogël, 3-vjeç, është stabilizuar dhe vazhdon të mbahet nën kujdes të posaçëm të mjekëve të reanimacionit.

Ngjarja tronditi komunitetin, duke rikujtuar rreziqet e produkteve të paidentifikuara të cilat mund të përmbajnë substanca narkotike. Hetimet e autoriteteve janë në vazhdim, për të zbardhur mënyrën se si karamelet përfunduan në duart e fëmijëve dhe për të përcaktuar përgjegjësit.