Ish-ambasadorja e Shteteve të Bashkuara në Tiranë, Yuri Kim, ka shpallur daljen në pension të parakohshëm, në moshën 53-vjeçare, duke i dhënë fund karrierës së saj diplomatike.

Lajmi u bë publik nga vetë Kim në një deklaratë në Uashington, ku të pranishëm ishin paraardhësi i saj në Shqipëri, Aleksandër Arvizu, dhe ambasadori aktual i Shqipërisë në SHBA, Ervin Bushati.

Vendimi vjen disa javë pasi Kim u pa në një protestë të diplomatëve të Departamentit të Shtetit, pas valës së shkurtimit të vendeve të punës të urdhëruar nga administrata e Donald Trump.

Yuri Kim shërbeu për më shumë se katër vite në Shqipëri, ku shpesh u bë figurë kontroverse. Ajo u përplas hapur me liderin e opozitës, Sali Berisha, ndërsa në memorien publike mbeti deklarata e saj e fortë se shqiptarët “nuk duhet të hanë bar për interesat e një njeriu”.

Pas misionit në Tiranë, Kim mori postin e Zëvendësndihmësskeretares së Shtetit për Evropën dhe Çështjet Euroaziatike, por rikthimi i Trump në pushtet solli një klimë të re në diplomacinë amerikane.

Megjithatë, ish-ambasadorja nuk ka dhënë ende arsyet e plota që çuan në këtë vendim të papritur për t’u larguar nga skena diplomatike.