Një sherr i dhunshëm mes disa grupeve të huaja ka ndodhur në orët e para të mëngjesit të së dielës në zonën Amendola të Milanos, ku një 32-vjeçar egjiptian mbeti i plagosur rëndë me thikë.

Ngjarja u regjistrua në rrugën Pellizza da Volpedo, ku sipas mediave italiane, viktima ndodhej me dy bashkatdhetarë të tij kur u sulmua nga rreth dhjetë persona. Ai u godit disa herë me thikë dhe u transportua me urgjencë në spitalin Niguarda, ku ndodhet në gjendje të rëndë, por sipas mjekëve është jashtë rrezikut për jetën.

Sipas dëshmive, mes agresorëve dyshohet të kenë qenë shtetas shqiptarë dhe të tjerë nga Afrika e Veriut. Autorët u larguan nga vendngjarja përpara se të mbërrinte policia. Ndërkohë, dy egjiptianët që shoqëronin të plagosurin janë marrë në pyetje nga karabinierët.

Hetimet janë në vijim për të zbardhur motivet e sulmit dhe për të identifikuar të gjithë personat e përfshirë. Autoritetet do të përdorin edhe pamjet e kamerave të sigurisë në zonë për të ndihmuar në hetime.