Një ngjarje e tronditshme ka tronditur qytetin e Sesto San Giovanni, pranë Milanos. Hayati Aroyo, 62-vjeçar me origjinë turko-italiane dhe kunat i bosit të njohur të mafias turke, Huseyin Sarai, u gjet i karbonizuar më 23 korrik në apartamentin e tij.
Hetuesit italianë zbuluan detaje makabre të krimit: tre persona, një çift dhe një shqiptar, e planifikuan gjithçka me ftohtësi. “Kisha frikë se mos ndjeja mëshirë, por jo. Shikoja vetëm për të kuptuar nëse do të ndjeja diçka, por më kot, nuk ndjeva asgjë”, shkruante gruaja e përfshirë në bisedat e sekuestruara nga telefoni i shqiptarit.
Sipas hetimeve, gruaja hyri e para në banesë duke lënë derën hapur për shqiptarin, i cili e goditi Aroyon me thikë rreth 30 herë. Më pas, trupi i pajetë u vendos mbi krevat, u spërkat me zbardhues dhe iu vu flaka për të zhdukur provat.
Hetuesit theksuan se krimi nuk kishte lidhje me aktivitetet mafioze të familjes, por motivin e kishin një video intime që dyshohet se viktima mund të shpërndante. Pas krimit, autoret tentuan të përdornin kartat e kreditit të Aroyos dhe të merrnin pajisje elektronike nga apartamenti, duke shtuar tensionin dhe kompleksitetin e hetimit.
Policia italiane nën drejtimin e Prokurorisë së Monzës arrestoi tre të dyshuarit: një burrë 38-vjeçar, bashkëshorten 36-vjeçare dhe një 33-vjeçar shqiptar. Të tre akuzohen për vrasje me paramendim, grabitje, zjarrvënie dhe shkatërrim kufome.
Ngjarja ka tronditur komunitetin dhe riktheu kujtesën e peripecive mafioze, por me një motiv personal që nxjerr në pah ftohtësinë dhe brutalitetin e autorëve.
