Barcelona dhe gjithë Spanja janë në pritje të një momenti historik nga talenti i jashtëzakonshëm, Lamine Yamal, i cili është mes të nominuarve për çmimin më prestigjioz individual në botën e futbollit, “Topi i Artë 2025”.

Adoleshenti 18-vjeçar do të jetë i pranishëm në ceremoninë madhështore që do të mbahet më 22 shtator, në Teatrin e Chatelet në Paris, ku do të garojë për titullin e futbollistit më të mirë të vitit.

Sipas mediave spanjolle, Yamal ka përgatitur edhe një plan special për këtë natë të paharrueshme: ai do të shoqërohet nga 20 anëtarë të familjes, të gjithë të veshur me krijime ekskluzive nga Dolce & Gabbana. Ky detaj e vendos sulmuesin e Barcelonës jo vetëm në qendër të vëmendjes sportive, por edhe asaj mondane.

Në sezonin 2024/25, Yamal shkëlqeu me fanellën blaugrana, duke luajtur në 55 ndeshje, shënuar 18 gola dhe dhënë 25 asistime, duke ndihmuar Barcelonën të fitonte La Ligën dhe Copa del Rey. Këto statistika e rendisin atë mes kandidatëve më të fortë për trofeun.

Megjithatë, favorit për çmimin mbetet Ousmane Dembele i PSG-së, ndërsa në garë janë edhe emra si Raphinha. Nëse Yamal arrin të triumfojë, ai do të bëhet një nga fituesit më të rinj në historinë e “Topit të Artë”, duke planifikuar më pas një festë private në Paris për të shënuar suksesin.

Të gjithë sytë e botës së futbollit janë tashmë të drejtuar nga Parisi, për të zbuluar nëse ky 18-vjeçar i jashtëzakonshëm do të shkruajë historinë.