Valter Bami, vëllai i Durim Bamit, është kapur nga policia e Elbasanit pasi ka thyer masën e arrestit shtëpiak.

Ngjarja ka ndodhur gjatë një kontrolli rutinë të qarkullimit rrugor, kur një efektiv ndaloi një automjet tip Audi, i drejtuar nga një shtetase. Pasagjer në makinë ishte pikërisht Bami.

Fillimisht, ai i ka kërkuar policit që të mos e vononte gjatë kontrollit, duke justifikuar se ishte në gjendje hasmërie. Por pas identifikimit të plotë, efektivi i qarkullimit ka shoqëruar 37-vjeçarin për në Drejtori Vendore e Policisë Elbasan.

Valter Bami akuzohet si i përfshirë në atentatin e ndodhur në Larushk të Krujës, ku mbeti i vrarë Ramazan Sino, 29 vjeç, kunati i Gentian Bejtjas, që dyshohet se ishte shënjestra e sulmit.

Autoritetet pritet t’i rikthejnë dosjen në Prokurori për shkeljen e masës së sigurisë dhe për të vendosur mbi një masë më të rëndë ndaj tij.