Policia greke ka finalizuar një operacion antidrogë në ishullin turistik të Rodosit, duke vënë në pranga tre persona, mes tyre dy shqiptarë të moshës 28 dhe 30 vjeç, të cilët konsiderohen si drejtuesit e një grupi kriminal që shpërndante drogë.

Hetimi nisi pas mbikëqyrjes së 30-vjeçarit, i dyshuar si furnizues dhe koordinues i shitjeve përmes telefonit. Gjatë aksionit, efektivët gjetën të fshehura në një park tetë pako me kokainë, me peshë totale 806 gramë, të futura brenda një lavatriçeje të vjetër. Po ashtu, në kontrollet trupore dhe në automjetin e përdorur nga shqiptarët, u sekuestruan telefona celularë, një sasi e vogël kanabisi si dhe pajisje për regjistrim imazhesh.

Dy të dyshuarit iu rezistuan oficerëve gjatë arrestimit, duke përdorur dhunë. Përveç akuzave për trafik droge, ndaj tyre rëndojnë edhe veprat penale të dhunës ndaj punonjësve të policisë dhe qëndrimit të paligjshëm në Greqi. Ndërkohë, 30-vjeçari përballet edhe me akuzën e shkeljes së rregullores mbi mbrojtjen e të dhënave personale (GDPR).

Sipas policisë greke, kokaina tregtohej me 100 euro për gram në ishullin turistik, ndërsa vlera e lëndës narkotike të sekuestruar arrinte deri në 80 mijë euro.