Deputeti i Partisë së Lirisë, Tedi Blushi, ka kërkuar që mbledhja e Këshillit Bashkiak të Tiranës, ku do të shqyrtohet shkarkimi i kryebashkiakut Erion Veliaj, të zhvillohet simbolikisht në Sharrë, në vendin ku ndodhet inceneratori i shumëdebatuar.

“Në Sharrë, aty ku nisi një nga aferat më të mëdha korruptive të Tiranës, duhet të nisë edhe pastrimi i qytetit nga korrupsioni, inkriminimi dhe abuzimi me pushtetin,” u shpreh Blushi në një reagim publik në Facebook.

Sipas tij, qytetarët shqiptarë po vidhen çdo ditë përmes pagesave që buxheti i shtetit i bën një inceneratori “fantazmë”, i cili, ndonëse nuk ekziston, vijon të përthithë rreth 90 mijë euro në ditë.

Blushi e cilësoi farsë debatin mbi ligjshmërinë e shkarkimit të Veliajt, duke shtuar se kjo nuk e ndryshon faktin se “qytetarët do të vijojnë të vidhen për tre dekada të tjera”.

“Tirana ka nevojë për një mesazh të qartë: askush nuk është mbi ligjin. Dhe vendi më i goditur për ta dhënë këtë mesazh është aty ku paligjshmëria mori formë, në truallin e inceneratorit që nuk ekzistoi kurrë,” u shpreh deputeti i PL-së.