Dy anëtarë të ekuipazhit të një avioni të kompanisë Ryanair u plagosën të dielën pasdite, pasi fluturimi nga Vitoria në veri të Spanjës drejt Majorkës u përfshi nga turbulenca të forta.

Incidenti ndodhi në momentin kur avioni po përgatitej të ulej në aeroportin e Palma de Mallorcës, ndërsa ishulli turistik përfshihej nga stuhi të fuqishme. Sipas mediave spanjolle, ekuipazhi po kryente kontrollet e sigurisë kur mjeti ajror u trondit papritur. Një prej stjuardesave u përplas me tavanin e kabinës, ndërsa një tjetër u godit nga karroca e shërbimit.

Në bord ndodheshin rreth 180 pasagjerë, të cilët mbetën të tronditur nga përplasja, por fatmirësisht nuk pati të lënduar mes tyre. Menjëherë pas uljes, në pistë mbërriti një ambulancë që i dha ndihmën e parë anëtarëve të ekuipazhit të plagosur.

Ky nuk është rasti i parë i ngjashëm për linjat e Ryanair. Pak muaj më parë, një fluturim nga Berlini në Milano u përfshi nga turbulenca ekstreme, ku nëntë persona mbetën të plagosur dhe avioni u detyrua të kryente ulje emergjente. Pasagjerët përshkruan skena paniku, me disa prej tyre që u hodhën nga ulëset dhe u përplasën në tavanin e kabinës.

Ngjarje të tilla janë regjistruar edhe në kompani të tjera ajrore. Në mars, një avion i United Express në Teksas u detyrua të bënte ulje emergjente pas plagosjes së pesë pasagjerëve nga turbulencat, ndërsa në nëntor një fluturim i Scandinavian Airlines u kthye nga Atlantiku për shkak të lëkundjeve të dhunshme mbi Grenlandë.