Gaborone, 23 shtator – Diamanti i dytë më i madh në botë, i quajtur Motswedi dhe me peshë 2.488 karatë (rreth gjysmë kilogrami), pritet të marrë së shpejti një destinacion të ri – në një muze prestigjioz ose në koleksionin privat të një miliarderi apo sheiku. Por, përpara kësaj, ai duhet t’i nënshtrohet një procesi të kujdesshëm vlerësimi.

I zbuluar verën e kaluar në Botsvana, në minierën e njohur Karowe, Motswedi po analizohet aktualisht nga kompania belge HB Antwerp, e specializuar në përpunimin dhe tregtimin e gurëve të çmuar gjigantë.

“Është shumë herët për t’i vendosur një çmim. Fillimisht duhet të inspektojmë gurin dhe të përcaktojmë çfarë mund të përftojmë prej tij në formë të pastër,” tha drejtori i marrëdhënieve publike të kompanisë.

Miniera Karowe, e cila ndodhet në pronësi të kompanisë kanadeze Lucara Diamond, ka prodhuar disa nga diamantët më të mëdhenj në botë. Përveç Motswedit, aty janë zbuluar edhe tre gurë të tjerë gjigantë, mes tyre edhe diamanti i tretë më i madh i njohur ndonjëherë. Së bashku, ky koleksion i katër gurëve mendohet se mund të kapë një vlerë prej të paktën 100 milionë dollarësh.

Botsvana ka një histori të pasur me zbulime të tillë. Para Motswedit, gurët më të mëdhenj të nxjerrë nga minierat e saj ishin Sewelo (1.758 karatë) dhe disa të tjerë që kanë thyer rekordet e industrisë. Megjithatë, diamanti më i madh i zbuluar ndonjëherë mbetet Cullinan, i gjetur në Afrikën e Jugut në vitin 1905, me peshë 3.106 karatë. Nga ai u përftuan disa gurë të çmuar, përfshirë “Yllin e Afrikës”, i cili sot është pjesë e kurorës mbretërore britanike dhe ruhet në Kullën e Londrës.