Gaza, 24 shtator – Hamasi hodhi poshtë sot akuzat e presidentit amerikan Donald Trump, i cili deklaroi në Asamblenë e Përgjithshme të Kombeve të Bashkuara se grupi islamist palestinez po pengon përpjekjet për një armëpushim në Rripin e Gazës.

Në një deklaratë për shtyp, Hamasi tha se fjalët e Trump-it janë të pavërteta dhe se “asnjëherë nuk kemi qenë pengesë për arritjen e një marrëveshjeje armëpushimi”. Organizata akuzoi kryeministrin izraelit Benjamin Netanyahu si “kriminel lufte dhe i vetmi përgjegjës për bllokimin e negociatave”.

“Administrata amerikane, ndërmjetësit dhe e gjithë bota e dinë se Netanyahu është ai që pengon të gjitha përpjekjet për të arritur një marrëveshje,” thuhet në reagimin e Hamasit.

Më herët gjatë ditës, Trump kishte deklaruar se Hamasi refuzon të lirojë pengjet që ndodhen në Gaza dhe se ky qëndrim është arsyeja kryesore pse nuk ka ende një armëpushim.