Një foto e publikuar nga kreu i opozitës, Sali Berisha, ka hapur debat të gjerë politik e publik. Në imazh, ish-kryebashkiaku i Durrësit, Vangjush Dako, shihet i ulur në një krevat dopio pranë ish-drejtorit të Tatimeve në bashki, Ron Shqopa, i cili së fundmi ka dhënë dorëheqjen.

Sipas verifikimeve të gazetarit Elton Qyno, fotoja është shkrepur në një dhomë speciale të spitalit të Durrësit, e destinuar vetëm për të paraburgosur ose të dënuar të IEVP-së. Kjo dhomë, e mbikëqyrur nga policia dhe e siguruar me hekura, ishte vendqëndrimi i Dakos për disa ditë, pasi Gjykata e Apelit të Posaçëm i shtoi dënimit edhe 6 ditë burgim.

Gjatë kësaj kohe, ish-kryebashkiaku ka pritur vizita nga familjarë dhe miq, mes tyre edhe Shqopa. Por fotoja ngre pikëpyetje mbi trajtim të privilegjuar dhe mungesën e kontrolleve, pasi Dako shihet duke përdorur një aparat celular – objekt i ndaluar për të dënuarit.

Burime pranë organit të akuzës sugjerojnë se Prokuroria e Durrësit mund të hapë një hetim për “futje të sendeve të palejuara në IEVP”, çka do ta ekspozonte Dakon ndaj një dosjeje të re penale.

Aktualisht, ish-zyrtari i lartë i PS ndodhet në shtëpi, pasi Drejtoria e Burgjeve i ka dhënë një leje vjetore 5-ditore, e cila shërbeu edhe për të shlyer shtesën e dënimit.