Autoriteti Kombëtar i Ushqimit (AKU) ka konstatuar praninë mbi normë të mbetjeve të pesticideve në dy produkte të importuara nga Greqia: pjeshkë dhe rrush të kuq francez, duke i klasifikuar si me rrezik për shëndetin e konsumatorit.

Kontrollet zyrtare zbuluan se pjeshkat përmbanin pesticide Phosmet mbi normat e lejuara, ndërsa rrushi i kuq francez kishte nivele të larta të Propamocarb. Produktet janë raportuar menjëherë në sistemin evropian të sigurisë ushqimore RASFF.

Rrushi i kuq u gjet në një supermarket Spar në Lezhë, me rreth 800 kg, ndërsa pjeshkat ishin shpërndarë në subjekte të ndryshme. AKU ka urdhëruar operatorët të njoftojnë të gjithë konsumatorët dhe të kthejnë produktet, ndërkohë që procedurat për bllokimin dhe asgjësimin e produkteve të kontaminuara janë në vijim.

Autoriteti apelon tek konsumatorët të jenë vigjilentë dhe të shmangin përdorimin e produkteve të dyshuara deri në përfundimin e procedurave të sigurisë.