Një gjykatë në Londër ka rrëzuar akuzat për terrorizëm kundër reperit të grupit Kneecap, Liam Óg Ó hAnnaidh, i njohur me emrin artistik Mo Chara, duke i cilësuar ato të paligjshme për shkak të një gabimi teknik në procedurë.

Ó hAnnaidh akuzohej se kishte shfaqur një flamur të Hezbollahut gjatë një koncerti në O2 Forum, Kentish Town, nëntorin e vitit të kaluar. Por kryemagjistrati Paul Goldspring, në Gjykatën e Woolwich, pranoi argumentet e ekipit mbrojtës se prokuroria nuk kishte ndjekur procedurat ligjore brenda afatit gjashtëmujor të përcaktuar.

“Akuza është e paligjshme dhe e pavlefshme dhe kjo gjykatë nuk ka juridiksion për ta gjykuar”, deklaroi Goldspring, duke theksuar mungesën e pëlqimit të nevojshëm nga drejtori i ndjekjes penale dhe prokurori i përgjithshëm.

Jashtë gjykatës, dhjetëra mbështetës të reperit festuan vendimin duke brohoritur dhe valëvitur flamuj të Palestinës dhe Irlandës. “Ne nuk do të heshtim!”, tha Ó hAnnaidh përpara turmës.

Deputeti i Sinn Féin-it, Paul Maskey, dhe kryeministrja e Irlandës së Veriut, Michelle O’Neill, e përshëndetën vendimin, duke e cilësuar procesin si një përpjekje për të heshtur artistët që flasin kundër luftës në Gaza.

“Kriminelët e luftës izraelitë duhet të ishin para gjykatave, jo Mo Chara i Kneecap. Sot, ata që janë në anën e drejtë të historisë kanë fituar”, tha Maskey.

Nga ana tjetër, Shërbimi i Prokurorisë së Kurorës njoftoi se po shqyrton me kujdes vendimin dhe se ekziston mundësia e një apelimi.

Menaxheri i grupit, Daniel Lambert, reagoi ashpër:
“Kneecap nuk ka asnjë akuzë dhe asnjë dënim në asnjë vend, asnjëherë. Policia politike ka dështuar. Britania nuk është në anën e drejtë të historisë. Liri për Palestinën!”