Një lajm i rëndë ka tronditur botën e futbollit. Billy Vigar, ish-lojtar i akademisë së Arsenalit dhe aktualisht pjesë e Chichester City, ka ndërruar jetë në mënyrë tragjike në moshën vetëm 21-vjeçare.

Sipas raportimeve nga mediat britanike, Vigar humbi jetën pasi u përplas me një mur betoni, duke pësuar një dëmtim fatal në tru. Ngjarja e rëndë ka sjellë reagime të shumta nga futbolli anglez, me klubin e Arsenalit dhe trajnerin Mikel Arteta që kanë shprehur dhimbjen e tyre të thellë.

“Lajmi është tronditës, e mora dje dhe mendova menjëherë për familjen. Është shumë e vështirë të përballesh me diçka të tillë në një mënyrë kaq të papritur. Shpresoj që ata të gjejnë forcë dhe qetësi në këtë moment tragjik. Ne i japim mbështetjen tonë të plotë familjes së Billy-t dhe mendimet tona janë me të dashurit e tij”, tha Arteta në konferencën për shtyp para ndeshjes kundër Newcastle.

Vigar kishte luajtur për skuadrat U-18 dhe U-21 të Arsenalit, por nuk arriti të debutojë me ekipin e parë. Megjithatë, ai mbahet mend si një futbollist me perspektivë dhe një djalosh i përkushtuar në fushë.

Arsenali publikoi një deklaratë zyrtare të enjten mbrëma, ku shprehej:
“Jemi të tronditur nga lajmi për ndarjen nga jeta të ish-lojtarit tonë, Billy Vigar. Mendimet tona janë me familjen, miqtë dhe të gjithë ata që e kanë dashur.”

Lajmi ka prekur thellë edhe tifozët e Arsenalit dhe të Chichester City, të cilët kanë mbushur rrjetet sociale me mesazhe ngushëllimi dhe homazhe për një talent që u shua shumë herët.