Në fshatin Vodicë të Selenicës, ku sot jetojnë më pak se 80 banorë, do të ndërtohet një urë e re me kosto rreth 1 miliard lekë të vjetra. Projekti është shpallur fitues nga kompania “Euroteorema Peqin”, me një ofertë prej 94.7 milionë lekësh pa TVSH, shumë pranë fondit limit të vendosur nga bashkia.

Banorët, megjithëse pranojnë rrezikun që paraqet pasarela e vjetër e ndërtuar në vitin 1976, shprehen skeptikë për shifrën marramendëse të projektit. Ata kujtojnë se ura mund të ishte riparuar me një shumë modeste prej 12 deri në 20 milionë lekësh të vjetra.

“Ne ishim gati ta rregullonim vetë. Me pak para ura do të bëhej e sigurt. Tani na flasin për miliarda, që s’i shohim kurrë”, thotë një prej banorëve të Vodicës.

Dokumentet e tenderit tregojnë kërkesa të ngjashme me ato të projekteve madhore: staf prej 54 punëtorësh, laboratorë testimi, certifikata ISO dhe standarde të larta sigurie. Kjo ka ngritur dyshime se investimi është fryrë përtej nevojave reale të komunitetit.

Ndërkohë, fshatra të tjerë të Selenicës përballen me mungesë ujësjellësi dhe rrugë të amortizuara. Me të njëjtën shumë, thonë ekspertët lokalë, bashkia mund të kishte financuar zgjidhje jetike për qindra familje.

Ura e Vodicës, ndonëse e domosdoshme për sigurinë e banorëve, po shihet si simbol i prioriteteve të përmbysura dhe i shpërdorimit të fondeve publike.