Në një intervistë për emisionin “Now” me Erla Mëhillin, gazetari Artan Hoxha dha detaje nga ngjarja e rëndë ku u vra biznesmeni italian Edoardo Sarchi. Sipas Hoxhës, ngjarja ndodhi në një arterie kryesore, ku personat që ishin me italianin, në panik, kanë zbritur nga automjeti për t’i shpëtuar plumbave.
“Plumbat kanë kapur gomën dhe diskun e makinës dhe një rikoshet e godet biznesmenin italian në një arterie kryesore, çka i ka shkaktuar vdekje të menjëhershme nga hemoragjia e madhe,” tha Hoxha, duke theksuar se ngjarja mund të mos ketë qenë për shkak të një konflikti të çastit. “Por për këtë duhet të kapet autori dhe të ezaurohen të gjitha dëshmitë për të dalë në një konkluzion final.”
Gazetari shpjegoi edhe vështirësitë logjistike që ndihmuan në përkeqësimin e situatës:
“Ngjarja ndodh në 12 të natës. Ka distancë nga Tepelena, dhe imagjinoni çfarë ndihme mund të japë ai spital. Ambulanca mund të jetë aty për inventar, por s’ka pajisje brenda. Spitalet e qyteteve të vogla kanë ngelur të tilla. Urgjenca janë. Distanca e madhe, do 1 orë e 30 minuta për të shkuar në vendngjarje.”
Hoxha theksoi se automjetet e shoqërisë ishin me probleme: “Një nga makinat pa karburant. Tjetrës i është çarë goma. S’kanë pasur mundësi për ta çuar. Nga hemoragjia ka gjetur vdekjen.”
Gazetari shtoi se autori i dyshuar, Kamber Sulçaj, ndodhet brenda vendit, dhe policia është duke negociuar që ai të vetëdorëzohet. Hoxha shpjegoi se në kushtet e vetëdorëzimit, autori mund të përfitojë lehtësira ligjore, pasi nuk bëhet fjalë për një ngjarje kriminale të mirorganizuar.
“Personi që ka bërë atë, Kamber Sulçaj, nuk janë gjetur armë zjarri. Janë me shumicë në atë zonë. S’ka parcelë hashashi që s’ruhet pa kallashnikov. Nëse s’kanë këtë, kanë armë të tjera. Nuk i është gjetur asnjë armë tjetër. Ai kishte armë gjahu, të tjera. Duhet të kapet ai dhe të tregojë personat që ishin nga krahu tjetër. A është ashiqare konflikt momenti apo jo, duhet të ezaurohet. Duhen deklarimet e tij dhe personave të tjerë,” tha Hoxha.
Gazetari shtoi se zona është e ekspozuar për kultivim kanabisi, por në këtë rast përjashtohet që motive kriminale të jenë të lidhura me aktivitete të tilla.
