Presidenti i Turqisë, Recep Tayyip Erdogan, ka deklaruar se Ankaraja nuk do të lejojë që territori i Sirisë të fragmentohet, duke paralajmëruar organizatat kurde që kërcënojnë stabilitetin e vendit fqinj.

“Ne kemi përdorur të gjitha kanalet diplomatike, si për të ruajtur integritetin territorial të Sirisë ashtu edhe për të parandaluar krijimin e një strukture terroriste përtej kufijve tanë. Ne vazhdojmë t’i përdorim këto kanale me durim, ndershmëri dhe logjikë të shëndoshë”, tha Erdogan gjatë një aktiviteti për rifillimin e punimeve të parlamentit turk.

Ai shtoi se, nëse përpjekjet diplomatike për të zbatuar marrëveshjen midis Forcave Demokratike Siriane Kurde (SDF) dhe qeverisë siriane dështojnë, Turqia do të marrë masa konkrete.
“Nëse nuk u jepet përgjigje iniciativave diplomatike, politika dhe qëndrimi i Turqisë janë të qarta. Turqia nuk do të lejojë që e kaluara të përsëritet në Siri”, theksoi ai.

Ankaraja e konsideron SDF-në një organizatë terroriste dhe ka paralajmëruar se është e gatshme të ndërmarrë veprime ushtarake nëse këto forca nuk integrohen me aparatin shtetëror sirian, në përputhje me marrëveshjen e arritur me Damaskun.