Ambasada e Bashkimit Europian në Tiranë ka shpërndarë një njoftim të rëndësishëm për qytetarët e vendeve jashtë BE-së, përfshirë edhe shqiptarët, të cilët udhëtojnë për qëndrime afatshkurtra në 29 shtetet e Zonës Shengen.

Sipas ambasadës, duke nisur nga 12 tetori 2025, do të vihet në zbatim Sistemi i ri i Hyrje/Daljes (Entry/Exit System – EES), një mekanizëm i avancuar i menaxhimit të kufijve. Ky sistem do të regjistrojë:
• të dhënat nga dokumenti i udhëtimit
• datat e mbërritjes dhe të largimit
• të dhënat biometrike (shenjat e gishtave dhe imazhi i fytyrës)

Ambasada sqaron se procedura nuk kërkon asnjë veprim të veçantë nga udhëtarët përpara nisjes dhe se nuk ka asnjë tarifë shtesë.

Ky ndryshim synon të rrisë sigurinë dhe të përmirësojë monitorimin e hyrjeve dhe daljeve në hapësirën Shengen.

Më shumë informacion mbi sistemin mund të gjendet në faqen zyrtare të BE-së: travel-europe.europa.eu/ees