Presidenti Bajram Begaj ka dekretuar zhvillimin e zgjedhjeve të pjesshme vendore në 6 bashki të vendit, përfshirë edhe Tiranën, në datën 9 nëntor 2025.

Në njoftimin zyrtar të Presidencës sqarohet se dekretimi u bë pas verifikimit të procedurave të ndjekura për shpalljen e vakancës në krye të Bashkisë Tiranë, si pasojë e shkarkimit të kryebashkiakut Erion Veliaj.

“Presidenti shqyrtoi rregullshmërinë e procedurës së ndjekur, në këndvështrim të respektimit të pavarësisë dhe autoritetit propozues të Këshillit Bashkiak, dhe konstatoi se deklarimi i vakancës është bërë në përfundim të një procesi konstatimi dhe verifikimi”, thuhet në njoftimin e Presidencës.

Institucioni i Presidentit thekson se në këtë proces është respektuar neutraliteti institucional, duke mos hyrë në meritën e çështjes.

Në sqarimin e mëtejshëm, Presidenca bën të ditur se shkarkimi i një kryebashkiaku për “mosparaqitje në detyrë për një periudhë 3-mujore të pandërprerë” i nënshtrohet juridiksionit të gjykatave administrative dhe jo Gjykatës Kushtetuese.

“Presidenti i Republikës konstaton se në periudhën nga data e miratimit të VKM-së nuk është regjistruar ankim në organin kompetent gjyqësor dhe nuk ka një vendim pezullimi nga ana e tij, ndërkohë që afati i Presidentit të Republikës për shpalljen e zgjedhjeve është vetëm 48 orë nga marrja e njoftimit”, sqaron Presidenca.

Me daljen e dekretit, Presidenca shton se mjetet ligjore mbeten në dispozicion të palëve, të cilat mund të ndjekin rrugët gjyqësore për mbrojtjen e interesave të tyre.